رحاب الوليد تعلن إعتزالها قبل الألعاب الأولمبية باريس 2024 !
نشرت لاعبة المنتخب التونسي للرماية رحاب الوليد تدوينة مفاجئة أعلنت فيها عن إعتزالها نهائيا قبل أسابيع من إنطلاق الألعاب الأولمبية باريس 2024.
وجائت تدوينة الوليد كالتالي:
منعرفش باش نبدا لكن حاسة بشعور من داخل من كثر الضغط فعليا ارهقني وتعبت من البكي وحدي
تو وقيت نخرج على الصمت ، اليوم بعد ما شفت وتأكدت اني في محل ضعف “نخاف بش نحكي نخاف نتكلم ونخاف نقول شبيني وشنحب منحبش”
لقيت روحي خاسرة برشا حاجات ، اني عييت وفديت مالي الا لحم ودم وانسانة، حاولت نتمالك الصمت منتكلمش لكن لقيت روحي قاعدة نتضرر
اني تعبت وفديت من المشاكل والنقاشات وبرشا حاجات ، اني انسانة بسيطة من عايلة بسيطة ونحب نعيش ببساطة ، نحب نسعى لحلمي وطموحي بكل ارياحية وبراءة
نحب نخدم فرحانة وشايخة عاملة كيف على خدمتي منحبش نحس روحي مغصوبة ومقموعة
فديت واني نشوف في روحي في حلقة ضعف
لذا بصراحة ومن كل قلبي اني معاش نجم نضغط على روحي اكثر منهكا ونحب نبعد معاش عيني في شي كان اني نرجع الفرحه والضحك لقلبي عيييت وتعبت وان شاء الله ترحموني وتحسو بيا و تشوفوني بعين الرحمة وتراعو ظروفي ونفسيتي الي تعبت ومنجم نعبر كان بكلمة تعبت
تعبت من البكي وحدي كل يوم وتعبت من الوجيعة الي ساكنة صدري تتصوروش قداش مخيبها
كنت ناوية نعلن الاعتزال بعد الالعاب الاولمبية ونخليها اخر محطة ليا لكن اني الي كنت نحكي فيه معاش ليا القدرة نتحمله اكثر او حتى نشوف اي حاجة تخليني موجوعة
مع كل احترامي وتقديري للناس كل بدون استثناء ، وللبعض حبيت تقرو وجيعتي هذي كوني شفتكم باب امل ليا
يؤسفني نعلن اعتزالي من الان وهذا قرار ماهوش وليد اللحظة هذا موضوع ليا قرابة 4 اشهر واني نتردد عليه وكل يوم نقول خلي نزيد نصبر لكن معاش نجم نتحمل يزيني تعبت والله
وقيت استراحة محارب هذا حق نفسي عليا يزيها تعبت ويزيني من التردد والخوف وبرشا حاجات معاش نحب نخمم فيها وقيت نرجع الضحكه لقلبي عييت وتعبت.
في إنتظار تحرك المسؤولين بين الجامعة التونسية للرماية ووزارة الشباب والرياضة لإيجاد حل حتى تتراجع الدولية التونسية عن قرارها وتخسر تونس مقعدا في أولمبياد باريس 2024.
